الخميس، 2 يوليو، 2009

ما دامت صفحه لجنونى

..
ماهياش راحه
على أد ما هى
حريــــه
ماهياش راحه
ولا لعب ولا تسليه
ماهياش راحه
وعشان تعيش الراحه
هتحتاج لتدخل و جراحه
!! وعمليـه
ماهياش راحه
ماهياش فرحه
لكن احساس بيعفى
م المسئوليه
ماهياش راحه
ماهياش ضحكه
دى دمعه و مستخبيه
و النظره تستغربها اه
تحبها يمكن
لكن ياريت
متفكركش النظره بيا
وياريت كمان
متفتكرهاش حنيه
دى نظره كده و خلاص
لا المقصود بيها هو
ولا فيها رساله لشخصيه
ولا ليها أى أهميه
اللى بيميزها بس
ان انت متشوفهاش
غير فى عينيها هى
و متغركش الابتسامه
و لا الصراحـه
دى بتدارى
و مخبيـه
و دى مش راحه
ومش دى القضيه
بس لازم تبقى عارف
انها مش اكتر من
حريـــــه
: أما القضيه
فى اللى راحوا
والقلب الغرقان
فى جراحو
القضيه فى الحياه
و الدنيـا
فى الدنيا ديه
فى ميت قضيه
و ألـف ميه
أولها هى
و أخرها هى
بابتسامتها
و بدمعتها
بصتها ليك
و موتها فيا
: عن احساسها
مهواش راحـه
أبداً .. خالص
مش مرتاحه
لكن دى
حريــه
حريـه
حريه

14 تعليقات:

ИaτaShia يقول...

باجى عند كلامك

وأقف ومعرفش أرد

مبــدعة حتى فى صفحـات جنـونك :)

" إبتسام "
كل الحنيــة !

2ragooZ يقول...

السلام عليكم
التصميمالاولانى كان احسن على فكره .. بس ده لا يمنع ابدا .. ان اللون الاسود ليه فخامته وكبرياؤه..
الحرية .. والبحث عن الحرية ..
اعتقد ان الحرية .. مش فى اننا نبقى طايرين فى الهوا .. او بنعمل كل اللى عاوزينه .. الحرية ..اننا نعيش مرتاحين .. حتى لو جوه قفص ..

زمان .. كنت باعتقد ان الحرية هي ان الواحد يبقى حر فى افعاله ..
لكن اكتشفت .. ان الحريه هى حرية الافكار .. والقدرة على تنفيذها ..
مش كل اللى افكارنا بتوصله بنقدر نحطه فى دايرة الفعل ..

وهو ده السجن الحقيقى

التى هى نفسى يقول...

ندى
وجودك لوحدو كفايه عندى أوى
و شرف ليا بجد
تسلمى يا حبيبتى
ديماً وجودك :)

التى هى نفسى يقول...

أراجوز
و عليكم السلام و رحمة الله و بركاته
التصميم الأولانى ..
التصميم الأولانى للأسف صوره كلها قلبت أبيض فجأه :) .. فاضطريت اشيله
و متفقه معاك فى كلامك عن اللون الاسود ، هو اللون المفضل بالنسبه لى :)

متفقه معاك كمان فى كلامك عن معنى الحريه
بيقولوا "أنت حر ما لم تضر" ..
الحريه هى انك تخطط للى انت عايزه و تنفذه و تتحمل نتيجته
و أثناء ما بتعمل كل ده ، متضرش غيرك أو نفسك
الحريه هى ان ميبقاش فى قيود عليك من أى نوع إلا قيم دينك و مبادئك

منورنى يا أراجوز :)
و ربنا يكفينا شر السجن D:

محمد يقول...

بعد يوم طويل اوي من السفرالترحال بين الكتب ومذكرات الامتحانات لقيت ميناء وقلت استريح شوية وانا بحتسي كوب من الشاي اللذيذ :)


"

و النظره تستغربها اه
تحبها يمكن
لكن ياريت
متفكركش النظره بيا
وياريت كمان
متفتكرهاش حنيه
دى نظره كده و خلاص
لا المقصود بيها هو
ولا فيها رساله لشخصيه
ولا ليها أى أهميه
اللى بيميزها بس
ان انت متشوفهاش
غير فى عينيها هى

"

الاقتباس ده عجبني جدا وكل التوبيك حلو بس دي كلمات حسيتها اوي

وحسيت فيها "عند" و"شجاعة" و "انطلاق" ... مشاعر بحبها اوي

الاسود هو الملك ... لكنه ملك ظالم ومغرور أوي ومش بيقبل شريك ... لكن الاستايل القديم بلونه الازرق كان متواضع وطيب ومحتوي الصور الجانبية وبارز جمالها جدا, عشان كده كنت بحبه اكتر ... الله يرحمه :(

التى هى نفسى يقول...

محمد

أولاً ربنا معاك فى امتحاناتك :)
و متشكرة أوى على كلامك الجميل ده

بس انا مش متفقه معاك فى ان الاسود ملك ظالم و مغرور
لكن عموماً كل واحد فينا بيشوف الألوان بطريقته
يعنى ممكن الاسود يكون بيعبر عن الاكتئاب بالنسبه لشخص
و شخص تانى مش بيلاقى الراحه غير فى اللون الاسود

إن شاء الله هغير التصميم قريب
بس موعدكش انه مش هيكون فى اسود :)

نورتنى يا محمد .. ديماً وجودك

محمد يقول...

لا حضرتك فهمتيني غلط

انا بحب الاسود اوي للاسف :( ... وبيني وبينه علاقة غريبة جدا

بس الغريبة انه عندي مش رمز للحزن او الكأبة .. انا فعلا بلاقي فيه راحة نفسية جميلة اوي

والتصميم ده والقديم حلوين جدا ماشاء الله ... انا كنت بهزر بس :)

التى هى نفسى يقول...

و ليه "للأسف" ؟؟
خليها بحبه بس :)

و مش غريب ولا حاجه انك بتلاقى فيه راحه نفسيه
لأن زى ما قلتلك كل واحد بيشوف الألوان و كل حاجه حواليه ، بطريقته

احنا اللى بنجمل الأماكن
التصميمين أجمل بوجودكم
نورتنى يا محمد :) ..

انا حرة يقول...

حلوة اوى بجد
و ايا كان سبب احساسها بالحرية..انها بعدت عن الاحاسيس السلبية اللى بتاخد من روحها و مش بتضيفلها غير الوجع..او لانها اتحطت قدامها الاختيارات المريحة كلها فسابتها و اختارت تعيش بحريتها او لانها خبت وجعها و ضعفها و قدرت عليهم عشان تعيشها حرة..مش مهم وصلتله ازاى لكن المهم انها وصلتله فى الاخر

بوست حلو اوى بجد

التى هى نفسى يقول...

وجودك أحلى بجد :)

Gharabawy يقول...

عاجز عن الرد
أبدى إعجابى بما قرأت وإندهاشى من سلاسة إسلوبك
ليتنى فى قوة حرف من حروفك وروعتهم
دمتى بكل خير وتوفيق

Ebtesam يقول...

ده من بعض ما عندكم يا ممدوح
شرفنى وجودك بجد :)

غير معرف يقول...

رغـم انك كررتي كذا كلمة , لكني مازهقتش اطلاقاً
جميلة
تعبيراتك
واسلوبك
التسلسل الجميل فى كلامك


ربنا يحميكي :)

إبتسام مختار يقول...

ربنا يكرمك

الأجمل وجودك :)