الأحد، 6 سبتمبر، 2009

لمجرد الرغبة فى الكتابة

هوية و هواية
أحياناً .. نكتب بلا هدف واضح
نكتب لمجـرد الرغبة فى الكتابة
حتى و إن لم تعبر عن شعورنا فى الوقت الحالى
يكفى أنه مازال باستطاعتنا ممارسة .. هواية
.. طالما شكلت جزءاً كبيراً من .. هويتنا
..
بدون ذكر أسباب
.. مش عارفه ليه يا بنتى كل ما بتجيلى رسالة -
بقراها بعين اللى بيتفرج على فيلم .. كأنها مش ليا
و مش مطلوب منى رد عليها .. مش قلة اهتمام ولا حاجه
بالعكس ده غالباً اللى بيبعتلى بيبقى فعلاً واحشنى
بس معرفش ليه مبردش
.. مع انى عارفه كويس انه هيسألنى
موصلكيش حاجة؟ -"
وصلنى -
أمال مرديتيش ليه؟ -
"......................... -
تصدقى انا كده برضو -
..
تكنولوجيا التعامل مع البشر
اكتشفت مؤخراً ان طرق التعامل مع البشر تطورت
و انك عشان تعرف تتأقلم مع تكنولوجيا العقول الجديده
لازم تتبع تعليمات سلامه معينة .. غالباً هتعرفها بالتعود
.. لأن لسه كاتالوجات التعامل منزلتش
.. و لسه ترجمة التصرفات منزلتش برضو .. فـ مثلاً
لو اتفاجئت بمكالمة من شخص مكلمكش من ساعة رحلة أسوان بتاعت المدرسة .. حاول تفتكر هو خريج ايه دلوقتى و اكتب قائمة بكل المعونات و المساعدات و الامكانيات المتاحة اللى تقدر تقدمهاله .. عشان تكون جاهز لما يطلب منك أى حاجه .. لأنه هيكون مستعجل جداً ! .. و طبعاً متحاولش تسأله ايه اللى فكرو بيك .. لأنك غالباً هتسمع رد بارد و سخيف و مستفز و لو مكنتش انت كمان شخص بارد و مضاد للسخافه و عندك مناعة ضد الاستفزاز .. فتوقع انتهاء المكالمة بسماع صوت القطر بعد خناقة شبه خناقة رحلة أسوان بتاعت المدرسة
بالظبط
..
أشياء تُنطق ولا تُكتب
حرفين فقط .. يخرجان من أعماق الروح -
!! لعل الـ .... تُريــــــــح
..
أشياء تُكتب ولا تُنطق
زرين فقط .. " : ) " .. من أعماق القلب -
!! بل ثلاثة أزرار ! .. نقطتان و مسافة و قوس
.. كى تتخيل أنت الابتسامة التى تحلو لك
!! فالابتسامة -عندى- أذواق

5 تعليقات:

محمد يقول...

خلال زيارة خاطفة دوما أجد مقتطفات جميلة من "فيلسوفة" بسيطة الكلمات .. سامية الأفكار

المقطع الأول من المقال .. عجبني جدا

التى هى نفسى يقول...

مش لدرجة فيلسوفة أبداً :))
حتى المقطع الأول كان تمهيد عشان تسامحوا فى اللى هيتقال بعد كده D:
خلى بالكو ان ده لمجرد رغبة فى الكتابة بس يعنى :))

تنورنى بزياراتك يا محمد
كل سنه و انت طيب :)

ИaτaShia يقول...

كـلامك ده عالم تانى خالص
وأنا بعشقه بكل مافيـه :)

التى هى نفسى يقول...

و هو بيعشق وجودك فيه
وحشتينـــى يا ندى
و نورتينى :)

التى هى نفسى يقول...

آسفه يا "أبنوسة"
اضطريت احذف تعليقك
زيارتك تشرفنى ..
بس آسفه مقدرش احتفظ بلينك مدونتك عندى
نورتينى و بعتذر ليكى مرة تانيه