الثلاثاء، 15 سبتمبر، 2009

مــا تـتـكـلــــم

!! ما تتكلم
ما تثبت مرة انك صح
ما تزرع خير مكان الجرح
ما تروى الأرض حبة فرح
!! ما تتعلم  
تقول الحق لو كان ايه
متسألنيش اقولو انا ليه
ما غيرك سابلك الشغلانة
و جيت انت و سبتها ليه
و هو راح و سابها ف ايدها
رمتها هى تانى عليه
!! و اهى بتندم
فـ روح قول للى ندمانة
.. تفكــــــــر
.. مــرة
!! تتكلم
لا غيرها مرة قال الحق
ولا انت رُحت قولتلو لأ
ولا كان هو عَتِب حرب
عشان يبقى اسمه
!! مُستسلم
و الكل بيقولى رضا
و الحقيقــه مش كده
لا ده راضى ولا انت كمان
و ده عادى و ده تعبان
و واحد تانى ساكت ليه ؟
!! بيتألم
و يمكن برضو هو كمان
لو كان هنا ف نفس المكان
كان هيقولى انا راضى
و ده العادى
و ده المعتاد
لا انا ساكت ولا جاحد
.. ولا رافض فـ يوم  
!! افهم
و عادى حالكو يتشقلب
و يتبهدل و يتمرمط و يتكركب
و تيجوا تقولوا لأ عايشين
و واكلين لحمة على شاربين
و شُكر .. خـاص للمسئولين
جزيل الشكر
!! نشكركم
على المُر اللى شاربينو
و شكراً للى واكلينها
!! ..آه شكراً  
ع اللى شايلينو
و ع البنية اللى شايلانا
و ع الشغل اللى
!! متكوّم
و ع الطفل اللى متلقح
.. فى جنب رصيف
!! بيتفســـح
مطر يهوس و حـر جنان
! بياكل م الزباله .. لبــان
و ميباتشى ف مرة جعان
.. ولا  
!! مبرشم
ولا انت رحت تتعالج
و قالوا فوت علينا بكره
ولا الوالده ف يوم راحت
فـ رجعت من هناك .. ذكرى
ولا هو زعل مره
ولا بات ليله متضايق
ولا مكشر .. ولا
!! مكلضم 
انا مش فاهمة ساكت ليه
و خوفك ايه و ليه و من مين
ليه ترضى تكون ما بين ملايين
واحد و من ضمن الساكتين
و شايفو ظالمو و ظالمها
و مستنى تكون مظلوم
و هتكون يومها ايه ؟
.. مكتــــوم
و اهو مكتوم على مظلوم
عشان يومها انت تتمزج
!! و تتنعم
هو انت ايه؟ معندكش رد؟
ما تقولى ساكت ليه بجد؟
! جرحتك ولا أحرجتك
انا مقَصَدتش الاتنين
!! ولا قصدتك
ولا غيرك ولا غيرو
! مفيش غيرى
انا والله ما قصدتك
لكن بهزأ ف ضميرى
يمكن يحس
!! و يتكلم
بس انت ايه ؟
تكونش فهمت
انى قصدتك
ولا اخدت
على خاطرك
انا والله ما قصدتك
فـ معلشى
عشان خاطرى
عشان خاطرى
متزعلشى
لأ استنى
!! تكونشى انت كمان زيى
طب ارجع تانى و اسمعنى
او اقولك
متسمعشى
. قوم اتكلم

8 تعليقات:

ИaτaShia يقول...

طب أنا أقولك إيه دلوقتى ؟
مفيش أى وصف ممكن يوصف جمال كلامك
ماشاء الله عليكى
بجد أنتى هـــــايلة
صقفة كبيرة بقى :$

التى هى نفسى يقول...

الكلام و المكان كله بيبقى أجمل بوجودك يا ندى
تسلميلى يا حبيبتى على ذوقك :)
ديماً وجودك يا رب

كل ثانيه و انتى بخير

محمد يقول...

""ما تقولى ساكت ليه بجد؟
! جرحتك ولا أحرجتك
انا مقَصَدتش الاتنين
!! ولا قصدتك""


مش ممكن بجد ... بسم الله ماشاء الله

حاسس انك بتلعببي بالكلمات .. او ان جنبك صندوق متبطن بقطيفة موجود فيه كل الكلمات , وانتٍ تختاري حسب هواكي

التى هى نفسى يقول...

الكلمات ملهاش قيمة من غير وجودكم
متشكرة أوى يا محمد على وجودك :)
و سعيده أوى بمتابعتك .. منورنى
كل سنه و انت بخير و صحه ..

انا حرة يقول...

على فكرة انتى بجد موهوبة..فكرتنى باشعار ايمان بكرى و انا بقراها..تسلم ايدك بجد و كل سنة و انتى طيبة مع انها متاخرة شويتين تلاتة :)

التى هى نفسى يقول...

على فكرة دى شهادة اعتز بيها :)
تسلميلى يا جميله .. منورانى
كل سنة و انتى بالصحه و السلامه
تنورينى فى أى وقت :)

Dr-Sahar Abdallah يقول...

اعذريني لو لم اجد حروف
كلمات
عابارات
اشعار
..
..
..
تصف ذلك
عاجزة امام ابداعك : )

,
فكرتني ماعرفش ليه بـ صفحة خمسة
كل مدى مابتبهريني
بحاجات
وتجبرني اني احتفظ بيها
لأنها تـُحف فنية
ويمكن اقل مايقال عنها





مكتوب كده
جوا الكتاب
سألت
مسمعتش جواب
طب هو ليه كتبوا كده ؟
ما هى الحروف طلعت سراب ؟
طب هو ليه بيعلمونا
نسكت لما يسألونا
و ليه جابولنا ميت كتاب
طب هو ليه لما يشوفونا
بيكلمونا ف المواد
من غير ما بيشرحولنا حاجات
كانت اهم من المواد
و من اللى مكتوب ف الكتاب
طب لو ممكن سؤال كمان
هو ليه كده من زمان ؟
عايشين نقول اقلب الصفحه
و الكتاب كان كله صفحه
لا عمرها اتقلبت ف يوم
ولا حد علمنا الهموم
ولا حد علمنا العذاب
لكن قالولنا دول نجوم
و ده القمر و اهو ده السحاب
نسيوا يقولولنا دى السما
ممكن تضيّع حلمنا
علمونا بالعمـى
حتى مشوفناش بعضنا
و اما سألت .. مين أنا ؟
قالولى أفتح صفحه خمسه
و الكتاب من صفحه واحده
معرفش ليه انا بس حاسه
انى شايفه , بس عارفه
ان اللى قدامى سراب
دول حتى كانوا بيقولولنا
ان الطيور بتخاف تطير
عشان متعرفش المصير
و كلمونا عن الكلاب
قالولنا نبعد عنها
عشان صحيح بتعضنا
و لو تقرب مننا
ممكن نموت
معرفش ليه بيخوفونا
و بردو نسيوا يعلمونا
ان الطيور بتدور بحريه
و ان الوفاء جوا الكلاب
و ان القلوب مش بس هيا
اللى ممكن توفى يوم
و ياريت يا دوب كات دى القضيه
لا دى حلقه ف تمثيلية
من خمس حلقات
بالظبط زى صفحه خمسه
مهما تفتكر او تنسى
مش هتلاقيها ف الكتاب
و سؤال كمان يمكن اخير
ليه الكلام بلون شفاف ؟
و ليه الكتاب مالهوش غلاف ؟
و ليه ماليش حق السؤال ؟
و ليه ماليش حق العتاب ؟
طب ليه معلموناش نطير ؟
و ليه جابولنا كتاب كبير ؟
و ليه سابولنا الشنطة تقلت ؟
و الفصل ليه مالوهش باب ؟
معرفش ليه فيه مِيت سؤال
و الجواب ف صفحه خمسه
حتى و احنا ف الاتوبيس
قاعدين نقلب ف الكراريس
و كنا لسه هنعمل حادثه
ما هو سواقنا من غير رخصه
و ابواب الاتوبيس الخمسه
ملهاش اوكره
لا و انا فاكره
طريقة الفتح ف صفحه خمسه
و دوا الجرح ف صفحة خمسه
و طعم الفرح ف صفحه خمسه
اه و على فكره
مفيش شباك
بس ممكن صفحه خمسه تجيب هوا
ده لو لقيت فيها طعم الفرح
طريقة الفتح , أو الدوا
و اخر حاجه قبل ما انسى
الكتاب من صفحه واحده
اما لو على صفحه خمسة
الصفحه مش جوا الكتاب
,,,
حفظتها من كتر ما قرأتها
ربنا يحميكي
:)

إبتسام مختار يقول...

:)

أهو انا دلوقتى مش عارفه ارد عليكى
غير بدعوه زى دعوتك
ربنا يحميكى

و متحرمش من وجودك :)