الأحد، 25 أبريل، 2010

هو إنتى ؟

هو إنتى .. اللى إنتى ؟؟
اللى هى قالوا عنها ..
ليها صوتى و فيها صورتى
هو إنتى اللى هى ..؟
نفسى ولا واحدة تانية ؟
هو إنتى اللى باقية ؟
ولا إنتى اللى روحتى !

تبقى إنتى ولا هى ؟

هو إنتى اللى قاسيه ؟
ولا إنتى اللى هاديه ؟
ولا تبقى إنتى اللى فاكره و عامله ناسيه
هو إنتى ؟

إنتى طيب عارفه حاجه ؟
ولا عاميـــه !
ولا تبقى إنتى اللى شوفتى ؟

إنتى اللى هى هى ..
من زمان و من البدايه
و اللى طول عمرى معايا
ولا طب إيه الحكايه ؟؟
تكونيش مرايتــى !!!

طب يا مرايه
هو إنتى اللى جوا ؟
ولا جوا يبقى إنتى
هو لسه هو هو ؟
ولا غيرتيه و تُهتى
ولا إنتى تبقى هو
ولا هو يبقى إنتى

مش مهم
هى هى
اه خلاص مش دى القضية

بس ليا سؤال و عندك
بلاش بقى تقوليلى ..
عنـده ...!
هفهمك لو جت إجابتك
و ان مجتش افهمها برضو

إنتى عايشـه .. ولا مُتــــى ؟؟

6 تعليقات:

محمد إمام يقول...

جميلة جدًا, فيها حوار جميل مع النفس, والأسئلة, وتسلسلها..

أحسنتِ :)

2ragooZ يقول...

إنتى عايشـه .. ولا مُتــــى


ما فيش حاجه بتفضل عايشه .. كله بيموت ..

بس لازم نفضل نحاول نصحيه .. عشان هى دى وظيفتنا فى الحياه ..

اننا نفضل عايشين ..
مش عايشين وخلاص ..
انما عايشين .. بنحلم ..اننا نبقى فعلا عايشين .. ولينا وجود ..

Ebtesam يقول...

محمد إمام~

أجمل كتير بوجودك
شرفتنى :)


أراجوز~

"إنك لميت و إنهم ميتون"
الله حى لا يموت
و بما ان الأمل ديماً فى ربنا
فلنعتبر ان الامل كمان لا يموت
مش كل حاجة بتموت ولا حاجه
الأمل -أهم حاجه- و بيفضل عايش

منورنى :)

Dr-Sahar Abdallah يقول...

طب يا مرايه هو إنتى اللى جوا ؟
ولا جوا يبقى إنتى
هو لسه هو هو ؟

عـلامات استفهـام انتجت الكثير من الدهشة والاستغراب مما اثار التفكير
مــَن تلك ؟

رائعة !
إنتى عايشـه .. ولا مُتــــى ؟؟

صحيح انتي عايشة ولا مُتي ؟؟!!

..
جميلة اوي اوي

إبتسام مختار يقول...

أجمل بوجودك
أوى أوى
:)

غير معرف يقول...

اديلى كتير معدتش هنا
بس بصراحه لما زرت مدونتك اخيرا النهاردة حسيت بان فاتنى كتير

حلوة قوى كالمعتاد منك
بس عندى تساؤل من مضمون القصيدة
زى ما فهمتها
هو الحياة اللى بتخلينا منقسمين جوا نفسنا مش عارفين نتعرف على نفسنا وكأننا غربا عن نفسنا ؟؟
ولا احنا اللى بنعمل كده فى نفسنا ؟
ايه رايك

تحياتى لمنطقتك الخاصة
البيضاء بكلماتها رغم سواد الخلفية

اول النور