الخميس، 19 أغسطس، 2010

إعترافات .. عن المدونات

ملحوظة : كل ما يلى سيكون عن المُدوِنين و المُدَوَنات لا أكثر ، فعلى من لا يهمه الأمر ألا يضيع وقته فى القراءة ، و كل ما يلى سيكون من وجهة نظرى ، فعلى من لا تهمه وجهة نظرى أن يُشارك من لا يهمه الأمر فى الحرص على عدم تضييع الوقت ، و إذا كنت مهتم بالقراءة لمجرد خبرتك أو ثقتك السابقه فى محتوى هذه المدونة ، فأنصحك أن تشاركهما أيضاً ، لأنى سأكتب كما لم أكتب من قبل ، و فى كل الأحوال تشرفت بالزياره ، رمضان كريم  :) ..


1
أعترف أننى -فيما يخص المدونات- .. "مظاهرجية" ! ، فتصميم المدونة كفيل بإما أن يجعلنى أزورها يومياً "قبل الأكل و بعده" ، و إما أن يجعلنى أقرر من اللحظة الأولى -أو ربما قبلها- أن أتركها بلا رجعه . فإذا كان التصميم يحمل اسم المدونة أو أى شىء "من ريحته" كان بها ، أحترمه مهما كان شكله لأنه يكفى أنه "متعوب فيه" ، أما إذا كان من التصميمات التى يتيحها الموقع عند الإنشاء ، فعلى حسب محتوى المدونة ، و إذا كان حجم خط عنوان المدونة كبير بالدرجة التى تجعلك تظن أن المدونة لا تحوى سوى عنوانها ، إذاً فهى من النوع الذى يُترك فى الوقت الذى يسبق اللحظة الأولى ! ، أما إذا كان حجم الخط مناسباً .. كان بها ، و إذا كان صغيراً فعلى حسب المحتوى أيضاً .. فهناك من المحتويات ما يجبرك على القراءة بتمعن ، حتى و لو كان اللون الغالب على المدونة هو أكثر الألوان التى تكرهها على الإطلاق ، و من المدونات ما تكره كل حرف فيها حتى و لو كانت تملك أحسن تصميماً رأيته منذ دخلت إلى هذا العالم العجيب 
2
أعترف أننى لا أفضل المدونات التى تُدخِلك فى "عالم عجيب" ! ، المدونات التى تبتعد جميع موضوعاتها عن الواقع بمسافه لا تُقطع بأى وسيلة للإيضاح .. "المدونات دى اللى بتبقى مليانه صور عجيبه كئيبه و كلام من أغرب ما رأت عيناك" .. لا أحبها مهما حوت من الإبداع الفنى ، أو بمعنى أصح ، لا أتحملها لأكثر من ربع ساعه أحاول فيها أن أقنع نفسى بأنى سأجد شيئاً مختلفاً عما وجدت

3
أعترف أننى لا أحب المدونات شديدة اللهجة :)) ، المدونات المكتوبة بالفصحى الفصيحه ، بلغة الضاد التى لا يعرفها أحد ، أعترف بأننى لا أفهم حرفاً عن قصد صاحبها الذى يتفنن فى إيجاد الكلمات البديلة المرادفه للكلمات المتعارف عليها كى يكون مختلفاً أو ربما ليبدو مثقفاً ، أو لأنه كذلك فعلاً ، مع احترامى و تقديرى الحقيقى له -مش مع احترامى اللى بتتقال فى المناسبات اللى زى دى ، لا بجد مع احترامى- فإننى لا أفهم قصده و ربما لا أفهم عما يتحدث أصلاً ، و أعترف أنه جهل منى قبل أن تكون مبالغة منه

4
أعترف أننى ناكرة للجميل (بدون علامة تعجب) .. فهناك الكثير من المدونات التى أعشق زيارتها ، و لكنى -حتى الآن- لم أصنع قائمة بالمدونات التى أتابعها

5
أعترف أننى شديدة الإهمال لأنى أحياناً أترك نفسى لذاكرتى التى فقدتها منذ سنوات ، فأنسى عناوين مدونات كانت قد أعجبتنى بشدة ، لمجرد أننى نسيت أن أضيفها للـFavorites
 
6 
أعترف أننى متكلفة بعض الشىء فى استخدامى الدائم للفصحى ، فأنا أحب العامية المصرية جداً ، و مع ذلك ، و رغم أخطائى النحوية الكثيرة ، نادراً ما أكتب بالعامية لأسباب -أعترف- أنى لا أرغب فى ذكرها

7
أعترف أننى لست مقتنعه 100% باسم مدونتى الحالى أو السابق ، ربما لأننى حقاً "مبتفرقش معايا أسامى" ، و أعترف أننى لنفس السبب ، لا أجيد اختيار العناوين لما أكتب

8 
أعترف أن السؤال أحزننى ، لأننى اكتشفت أننى لا أعرف بالتحديد متى أكتب نصاً كاملاً -بالتفصيل- عن نفس الموضوع !

9
أعترف اننى لا أقدم محتوى شديد الإفادة لمن يأتى إلى هنا ، أحاول و لكنى لا أعد أحد بأن تكون كل المحاولات ناجحه

10
أعترف أننى لا أجرؤ أن أكون مثل معظم المدونين  .. أكتب كل ما يدور بذهنى أو حتى نصفه ، حتى و لو كنت فى أمس الحاجه للتعبير عنه ..

تـلك اعترافـاتــى فمــا اعتـرافاتكـــم ..؟

12 تعليقات:

Dr-Sahar Abdallah يقول...

!!

إبتسام مختار يقول...

??

انا حرة يقول...

اعترف انى بحس بغيرة ادبية رهيبة من اتنين مدونين بالتحديد..بيبهرنى اسلوبهم لدرجة بتحسسنى انى بكتب حاجات فى تفاهة رجل المستحيل و فلاش :)

اعترف ان مدونات الاصدقاء بدخلها اكتر من اللازم و بهتم جدا انى اسيب تعليقات فيها اكتر من مدونات ناس تانية بتعجبنى كتاباتهم و مش دايما بلاقى تعقيب او اضافة للموضوع..فبقرا و امشى

اعترف انى ما بعرفش اعلق عند حد عشان اهتم و ساب تعليق عندى..لو ما عجبنيش البوست ما بعرفش اجامل و لو جاملت بيبان اوى جدا خالص :)

اعترف انى حبيتك جدا من غير ما اشوفك ولا يكون فى بيننا كلام بعيدا عن المدونات..بس حقيقى وجودك عندى بيسعدنى جدا و قرايتى لكلامك بتبسطنى فوق ما تتخيلى..ربنا يديم المعروف :)

سؤال على جنب:ما تعرفيش ليه مش بتبان عندى بوستاتك الجديدة مع انى حطاكى فى الليست بتاعت البلوجات اللى بتابعها؟
اللى بيحصل انى بتوحشنى مواضيعك فبدخل عندك صدفة فالاقى كذا بوست اتعملوا و عدوا من غير ما اقراهم!!!

إبتسام مختار يقول...

اعترف انى بحس بغيرة ادبية رهيبة من اتنين مدونين بالتحديد..بيبهرنى اسلوبهم لدرجة بتحسسنى انى بكتب حاجات فى تفاهة رجل المستحيل و فلاش :)

طب احمدى ربنا انهم اتنين بس
أنا عندى أعداد أكبر من كده بكتير :))

اعترف ان مدونات الاصدقاء بدخلها اكتر من اللازم و بهتم جدا انى اسيب تعليقات فيها اكتر من مدونات ناس تانية بتعجبنى كتاباتهم و مش دايما بلاقى تعقيب او اضافة للموضوع..فبقرا و امشى

بيتهيئلى لو حاولتى شوية مع نفسك هتلاقى عندك تعليق
حتى لو مجرد كلمة تعبر عن إعجابك بس
بتفرق أوى على فكره

اعترف انى ما بعرفش اعلق عند حد عشان اهتم و ساب تعليق عندى..لو ما عجبنيش البوست ما بعرفش اجامل و لو جاملت بيبان اوى جدا خالص :)

خليكى على كده متحاوليش تتغيرى :))
أو لو حابه تعلقى ممكن توضحيله وجهة نظرك بدون مجامله

اعترف انى حبيتك جدا من غير ما اشوفك ولا يكون فى بيننا كلام بعيدا عن المدونات..بس حقيقى وجودك عندى بيسعدنى جدا و قرايتى لكلامك بتبسطنى فوق ما تتخيلى..ربنا يديم المعروف :)

اللهم آمين
أعترف انه شعور متبادل :)

.b : سألتينى قبل كده :)
مش عارفه بصراحه ده يرجع لإيه غير سوء حظى
بس ممكن اقولك حل بديل
لو بتفتحى فيسبوك ادخلى الصفحه بتاعت المدونة و كل ما هيكون فى بوست جديد هتعرفى

كل سنة و انتى طيبه
رمضان كريم :)

ИaτaShia يقول...

أنا بعترف
إني مادخلتش عالم المدونات بما فيه الكفايه عشان أكتب أي أعترفات عنهم

ممكن أعترف بحاجة
على أد ما بحب flied away
على أد مابحس إنه مكـان ملل أوي


..

يارب منورة على طول :)

إبتسام مختار يقول...

طب ما دام بتحبيها
ما تحاولى تشوفى اللى بيخليكى تحسى كده
و تغيريه عشان متبقاش ممله

مع إنى مش شيفاها ممله
هى بس محتاجه منك شوية اهتمام

يا رب انتى ديماً منورانى :)

محمد يقول...

اعترف انك ماشاء الله كاتبة مميزة وليكي مستقبل باهر حقيقي ان شاء الله

---

اعترف اني بحزن لما كتير كنت بمر من هنا ومش بلاقي مواضيع جديدة , ونفس الشعور بحسه في اي مدونة من المدونات اللي اتعودت ازورها

---

اعترف اني بحب اكتب مواضيع كتيرة , لكن الامتحانات شغلتني جدا عن مدونتي واغلب مواضيعي الاخيرة بحسها غريبة جدا

---

اعترف اني عارف ان 99 % من كلامي لا يهم أحد ...

---

اعترف اني بنسبة كبيرة جدا اكتب فقط لنفسي ... ليس تقليلا من احترامي لأحد , فكل رأي قيل فيما كتبت يوما ما هو وسام ... لكني فقط أكتب لنفسي ولم أجد بعد من أكتب له سوي "أبي" ربنا يرحمه ...
---

اعترف اني اكتب مايعجبني , وليس مايعجب الناس ,كما ألبس مايعجبني ,, وكما أتناول ما يعجبني

طالما لا يغضب ربي

تدوينة جميلة جدا .. واسمحيلي اقتبس العنوان واعمل منه مقال في مدونتي



كل رمضان وانت بخير

ولو انها متأخرة .. بس الامتحانات مش راحماني معلش


:)

إبتسام مختار يقول...

مش شرط الناس يكونوا عاشوا كلامك عشان يبقى مهم بالنسبه لهم
كفايه أسلوبك و طريقة تعبيرك عشان يهمهم اللى بتكتبه
اكتب اللى يعجبك
و اللى يعجبه ذوقك هيعجبه اللى كتبته
بيتهيئلى مفيش حد بيكتب حاجه مش عجباه لمجرد انها هتعجب الناس
حتى الكلام اللى مش طالع من القلب
مبيوصلش لا للقلب ولا العقل ولا لأى حته :)

كل سنة و انت بالصحه و السلامه يا محمد
و ربنا معاك فى إمتحاناتك

dr.lecter يقول...

انا مبهتمش بالشكل اوي انا يهمني المحتوي او بالاصح لازم يكون المحتوي متمرد غير تقليدي مقارب نوعا ما لافكار معجب بها لكن مبعلنش عنها

مبحبش اللون الاسود للمدونات الخلفيه يعني مابتريحنيش وباتعب من قرايتها بس فيه مدونات غصب عني باضطر اتابعها لانها تستحق

اعترف اني مبحبش المدونات من نوعيه بيحبني لا مابيحبنيش
او حالسه اني منعزله والناس وحشه
او الكون كله بيدور والكلام ده

فيه ناس قليله تقدر تسبيب انطباع كويس جوايا بس نادرا الاقيهم

اعترف اني مدمنن قرايه للمدونات الجريئه معدا اللي بتوصل لحد التجديف او الانغماس في الجنس

اعترف ان فيه مدونين باتعلم منهم وبيلهموني بوستات وبياثروا عليا

اعترف ان اللي خلاني ادخل واحب المدونات هم رحاب بسام وغاده عبد العال اللي اتنشر لهم كتب ناجحه في دار الشروق

اعترف ان المدونات السياسيه الهامه قليله جدا والباقي كله هجص واي كلام ومابتطعش منه بحاجه

اعترف ان فيه مدونات محدش يعرف عنها حاجه ومتتيخيلش انا كل مره اقرا لهم بيحصل لي ايه من الابهار في كلامهم

اعترف اني ساعات مبحب اعلق علي بوستات ليا لاني بكتبها لاني باكون عاجز عن الكلام لو البوست حاله خاصه بيا وصعبه اني اشرحها لناس او افسرها لهم

Timo.. يقول...

اعترف باني ما باحبش اضيف (ريدر) عني في المدونة عشان مش باحب الحاجة (السهلة) ولازم احفظ عناوين المدونين واروح لهم عشان هما يستاهلوا ده..!!

اعترف كمان اني ما بحبش طريقة التدوين اليومي..الشخص اللي ممكن يقرأ يوميات حد هو حد بيحبة لدرجة الـ(ملل)..!!

اعترف باني ما بحبش المدونات الغارقة في اشعار كئيبة ورومانسية (ملزقة)..!!

اعترف اني باكتب كل يومين فكرة او بوست ..ومش بانشر غير بوست كل شهر تقريبا..يمكن باخبي اللي باكتبة لحد(واحد ) بس (';')

اعترف باني (لحد دلوقت) بتعجبني افكارك و (بأتغاظ) من(قلة) كلماتك احيانا :)

إبتسام مختار يقول...

dr.lecter

أنا معاك جداً فى بعض اعترافاتك
وسعيده بيها و بوجودك
رمضان كريم :)

إبتسام مختار يقول...

Timo

اعترف باني ما باحبش اضيف (ريدر) عني في المدونة عشان مش باحب الحاجة (السهلة) ولازم احفظ عناوين المدونين واروح لهم عشان هما يستاهلوا ده..!!

مش شرط تكون بتستسهل
ممكن تعمله عشان الناس تعرف انت بتتابع ايه
و برضو ابقى افتح المدونات باللينك زى ما انت عايز :))

اعترف اني باكتب كل يومين فكرة او بوست ..ومش بانشر غير بوست كل شهر تقريبا..يمكن باخبي اللي باكتبة لحد(واحد ) بس (';')

ليك مطلق الحرية طبعاً فى التصرف فى كتاباتك
بس بيتهيئلى شهر كتير أوى على الناس اللى بتحب تتابع مدونتك

اعترف باني (لحد دلوقت) بتعجبني افكارك و (بأتغاظ) من(قلة) كلماتك احيانا :)

نعتذر يا فندم عن إغاظة حضرتك :)