السبت، 28 أغسطس، 2010

انتى عارفه ؟



انتى عارفه انك صديقتى قبل لحظة ما اتقابلنا ؟
انتى عارفه انك صديقتى ؟
انتى عارفه انك حبيبتى قبل ما نشوف فين مكانّا
قبل ما ندوّر على دورنا فى زمنّا
انتى عارفه يا حبيبتى ؟
إنى بعد العمر رح اجى عندك ..
أبتسملك ..
أشكرك على كُل حبك
أشكرك على نور فـ وشك ,,
كان منورلى فـ حياتى .. كل وقتى
انتى عارفه انى بعيش العمر بس عشانك انتى ؟
انتى عارفه ان انتى .. انتى !!
انتى عارفه ان انتى ربطانى بحياتى
مهما مُتى !
مهما اقرب تبعدى أو مهما غبتى
انتى عارفه ان بوجودك بضحك للزمان
و ان لحظة فـ بيت غيابك قادره تنسينى اللى كان
و ان لما بترجعى قبل الآوان
بفهم انى كنت رايحه .. و انتى شديتى  فـ كُمى
رجعت .. روحتى
انتى عارفه ان انتى أمى ؟
و انتى أختى
انتى عارفه ان انتى معنى وحيد لإسمى
مع ان انا معرفش اسمك
بس عمرك ما اتوجدتى جواب لحيرتى
انتى عارفه انك سؤال تاهت إجابته ؟
عارفه انى مش عارفه ..
 ايه هو !
و ازعل ..
لو عرفته
عارفه انك جوا جوا ؟
و جوا أعماق اللى جوا
دايقه م المر اللى شفته
زى ما شربته .. شربتى
انتى عارفه زيف ملامحى
عارفه كدبِة .. إبتسامتى
انتى فاتحه بيبان حياتى .. ع الحقيقه
انتى مهما يطــول غيابك .. يا بريئــــه
مش بشك انا عمرى فيكى .. و لو دقيقه
أصلك انتى حقيقتى لكن ،
انتى مش عارفه حقيقتى
انتى مش عارفه انى مش عارفه
مين انتى ..

6 تعليقات:

اقصوصه يقول...

رمضان كريم

وكل عام وانتم بخير :)

إبتسام مختار يقول...

الله أكرم

كل سنة و حضرتك بالصحه و السلامه :)

ИaτaShia يقول...

كـلامك ديمـاً فيه حاجة مميزة
ومختلفة
ورغم أنه بيبقى فيه حبـة غمـوض كدة
بس بيبقى فيه متعة فى الكلام
تخلي الواحد يفضل يقراه وعمره مايزهق

إبتسام مختار يقول...

وجودك ديماً كله على بعضه مميز :)

متحرمش منه ..

غير معرف يقول...

طــيب بـُصي
..
انا اتمنيت أكتب حاجة زيي دي
ربنا يحميكي ويكرمك يارب
:)

إبتسام مختار يقول...

انتى تكتبى أحلى من ده يا سهر
متحرمش من وجودك يارب :)