الثلاثاء، 21 سبتمبر، 2010

سيدى الفاضل .. هو فى إيه ؟


معلش بقى إحنا بنتكلم
هو فى إيه ؟ بجد يعنى فى إيه ؟
يعنى إيه الكتب الخارجية اللى هى بالنسبة للناس أساسية مش خارجية ولا حاجه فجأه متبقاش موجوده ؟
و لما احنا عايزين نغيّر أوى كده يعنى .. طب ما نغير كتب المدرسه الأول تبقى فى مستوى الكتب الخارجية !
يعنى إيه يبقى فى تشديد على الغياب فى المدارس و مفيش مدرسين بيشرحوا أصلاً للطلبه !
و يعنى إيه لما المدرسين يشرحوا يكون الشرح عباره عن 45 دقيقه من الرغى المتواصل اللى مالوش معنى أو خارج الموضوع أساساً
يعنى إيه تتناقش مع مُدرس فى حاجه بيقولها غلط و يصمم على رأيه لحد ما بقية الطلبه يخرجوا من الفصل فـ يقولك ان كان عندك حق فى اللى بتقوله و يعترف ضمنياً انه ميعرفش حاجه عن الماده اللى كان داخل يتكلم عنها !
يعنى إيه يبقى فى قرار بتدريس مادة باللغة الإنجليزية للمدارس اللغات و المدرسين لحد دلوقتى بيشرحوها بالعربى سواء فى المدارس أو فى الدروس الخصوصية !
يعنى إيه أصلاً تفاجىء الطلبه بقرار زى ده من غير ما تعلن عنه قبل بدء الدراسه بفترة كافيه
و يعنى إيه قبل ما تاخد القرار ده متفكرش فى عدم وجود مدرسين يدرسوا بالإنجليزى
و يعنى إيه عايز الطلبه يدرسوها بالانجليزى و عاملهم الكتاب بالعربى !
يعنى إيه تبقى مش فاهم بتدفع مصاريف المدرسة مقابل إيه !
سواء فى المدارس الحكومية أو الخاصة
يعنى إيه تبقى مصروفات المدارس اللغات غالية من غير ما فى كتب أجنبية
و يعنى إيه تكون المصروفات دى مقابل مجرد وجودك فى المدرسه و انت أصلاً متتشرفش تقول اسمها لحد !
يعنى إيه تدفع 80 أو 90 ألف جنيه فى السنة لمدرسة خاصة مقابل معاملة سيئة مالهاش علاقة بالمعاملة التربوية
و يعنى إيه تدفع نفس المبلغ لأحسن مدرسة فى البلد أصلاً برضو ؟
يعنى إيه تاخد درس "خصوصى" فـ تكون واحد من ضمن 400 طالب بيشرحلهم نفس البنى آدم
و يعنى إيه نفس البنى آدم ياخد من كل واحد من الـ400  ما قد يُعادل ربع مرتب والده و كل ده فى مادة واحده !
يعنى إيه تساوى طالب اجتهد و تعب نفسياً و جسدياً عشان يكون مجموعه فى النهاية 96% و يدخل الكلية اللى بيحلم بيها
بطالب معملش أى حاجه فى حياته غير إنه طلع ابن لأب معاه كام ألف محيرينه فقرر يدخله نفس الكلية بمجموع 52%
يعنى إيه نفس الحكومة اللى عملت الكلية بمجموع عالى وفرت فرصة دخولها لناس تانيه برقم لا تجوز تسميته بـ"مجموع" أصلاً
يعنى إيه يكون الطالب عايش كل ده و تطلب منه يقول بأعلى صوت :
"تحيا جمهورية مصر العربية" !
و يعنى إيه هى تحيا و هو يموت !
يعنى إيه ثانوية عامة ؟
و يعنى إيه تعليم مجانى ؟
و يعنى إيه تعليم مفتوح ؟
يعنى إيه جامعه خاصة ؟
و يعنى إيه رؤية و رسالة ؟
و يعنى إيه جودة ؟
و يعنى إيه تطوير ؟
يعنى إيــــه ..؟

سيدى الوزير ..
يعنى إيه كلمة وطن ؟

7 تعليقات:

غير معرف يقول...

هـــا ؟
يعـــني أيه ؟

يعــني ايه تعلـيم بـ المجان زز وفي نفس الوقت المصــاريف 500 جنيه تحت الحسـاب :D

ويعنــي أيه تعليم خاص بـ 100.000 في السنة .. ومـافيش خــاص ؟

يعــني أيه أضمحلال في الاسـلوب والمستـوى , ولسه بنقـاوح اننا في " مصــر " ؟

" وزارة التربية والتعليم "
طلبوا التربية قبـل تعليم , ورغم لك
فــلا يوجد تربية
وبالتـالي لآ يوجد تعلـيم !

أنا عــايزة أعرف بقى يعني ايه " ايه " دي

هــا ؟
يعنــي أيه ؟!!!

غير معرف يقول...

خلتيني أنفعل بجــد

الموضوع بقـى فعلا مُثير لـ الاهتمام
الموضوع عايز مناقشة اكبر من انه يكون توبيك بنتناقش احنا فيه
بس صحيح !
هي القضايا اللي وصلت راحت يعني فين ؟

انا عايزة أخرج الطـاقة اللي جوه دي بجد

انا بالمعنى النفسي والعصبي وكل معنى تضمنه الكلمة دي
أنا " مفقوعة "

dr.lecter يقول...

فيه ان مافيش بلد اصلا ولا رؤيه ولا نظام
فيه ان البلد ضاعت خلاص وانهارت
وفيه ان طول ماحنا ساكتين يبقي نستحق الخراب الي بنشوفه

فيه ان جه الوقت علشان نقولهم كفايه لحد كده

الدائخ يقول...

يعني إنك في مصر .. صح النوم يا مدام :)

NaDa يقول...

حطي فوق ده كله
إن اللى مصانع اللى بتطبع الكتب
فيها عمال ، والعمال دول عندهم بيوت
يعني حالهم واقف أصلاً

يعني أيه أصلاً بقى
لما الأبتدائي مايخدوش أصلاً كتب الوزارة
يعني ياريتها على الكتب الخارجية وبس


طب ليه يعني رعب الثانوية العامة ده
ولا كأنك فى حرب ولاداخلة على معركة
بينك وبين الدراسة
عشان مفيش حاجة بتيجي مباشرة

نفسي أعرف بجد
ليه عايزين يشغلوا الطلاب
وأولياء الأمور
هو لازم كده كل حاجة يبقى فيها مشكلة

يعني إيه وطن
يعني معاني أسمى وأكبر من أي حاجة
يعني أمـان فى بلدك
يعني راحة
يعني عدل
يعني حاجاااااات كتيييير أوي

khalid يقول...

والله يا ابتسام للاسف احنا ناس بنطبقى انظمه متطورة بعد لما الدنيا تغرق بس فى نفس الوقت مفيش امكانيات للأنظمة دى هو كده هتطبق عشان يقول احنا بنطور فى نفس الوقت اللى الطلبه فيه ميعرفوش يكتبوا اسمهم الا من رحم ربى و عاوز اقول حاجه كمان لو تسمحيلى يعنى ايه طفل فى الحضانه يدفعله 3000 جنيه فى السنه ؟؟عشان ايه و هيتعلم بيهم ايه ؟؟ و يعنى ايه تروح مكتبه عشان تشترى كتب الوزاره ؟؟
حسبى الله و نعم الوكيل .لكى الله يا مصر و اسف للاطاله

إبتسام مختار يقول...

سهــر
كلنا مفاقيع

dr.lecter
كفايــــه لحـد كـده
سمعوا ؟

الدائخ
أهلاً
صباح الخير

نــدى
لو على وقف الحال
حطى فوق عمال المصانع أصحاب المكتبات
اللى ده الموسم بتاعهم أصلاً
أما بالنسبة لمعنى الوطن
فـ ده المعنى اللى فى كتبهم برضو
للواقع حسابات آخرى :)) !

خالـد
ولا اسف ولا حاجه
لنا الله جميعاً