الجمعة، 1 أكتوبر، 2010

! أنا مش بمثل

إنتى فاكرة إنى بهزر ؟

كل ما اصرخ تخنقى أكتر !

إنتى فاكره إنى بمثل ؟

ولا إنى أهبل و عيل ؟

لاجل ما تدادى بكشر !

و اما هتنادى رح اجى بسرعه عندك

و انسى وعدك ..

لما تدينى المِسَكر !

و أنسى إنك قولتى رح تحكى

اما هكبـــــــر

انتى فاكره انى صغير ؟

انتى فاكره لما اقولك اتخنقت

ببقى لسه فيا أكتر ؟

لما اقول إنه كفايه

يبقى لسه لك معايا

فـ قلبى ليكى شىء منور؟

انتى فاكره اللى انتى فيه بيوجع و بس

فاكره انى فـ مرة جنبك ..

و فـ ألف ناسى و مش بحس !

طب ده إنتى كل ناسى

و انتى أمى و أختى و أكتر

انتى وجعك مش بيوجع

انتى حالك -بس- ..

يقهــــــــر

انتى مش عارفه اللى فيها ؟

ولا عارفه و سايقه فيها ؟

عارفه كام مرة طلبت ..

عارفه طعم رجائى ؟.. مَرر !

عارفه كــام مـره اضــربت !!

عارفه كام ضربة ؟

فـ مَقتل !

عارفه معنى إنك تكونى

إنتى أصلى و إنتى لونى

انتى عربيه و كلامى ..

عربى .. مكسر !

عارفه إنى شفت فيكى

و شفت منك

اللى خلانى أقولك ..

طظ فيكى !

و اغير عليكى

بالأوى !..

لو حد مَسِك

عارفه انى صحيح زهقت

من قولة بحبك

اللى مش كافية .. تغيــر !

كل ما أندهلك تقولى لسه

إصبـــــــر

و الإجابه مش اختيارى

انت مُجبـر

انت أصلك مش بتفهم

مش بتعرف حتى تحلم

مش ضرورى جواز و شقة !

مش مهم خضار ، فى دُقـه

أما أمر صحيح يحير !

انتى عايزانى أقول ايه غير كفايه ؟

انتى ليه كده عامله مش فاهمة الحكاية ؟

شايفه ولا مش شايفه الإهانة !!

نفسى ولا انتى ..

مين فيكو الجبانة

مين هينهى كل شىء برصاصه

-طايشــــــــــــه- !

لو فكرت أفكـــر !!

مين بيقتل بالبطىء حلمى البسيط

مين بيتهم البرىء .. فاكرو عبيط

و فاكرنا هنصدق كلام .. لما يبرر !

لا مش عبيط .. ده بير غويط

كان ناوى ع الشر و بيحفر !

مين قالك انتى و قالهم إن احنا هُبل !!

جبتم منين معلومة إن الظلم سهل

و القتل سهل

و الحبس شهر من بعده البراءة

أنا عايز اقولك ان قلبى جرىء جراءة

و إنه لو هتساعدى .. يقدر !

و انك صحيح عالية و أميره

مهما يكون انتى الكبيره

بس ..


الله أكبــر

8 تعليقات:

Timo.. يقول...

"مين بيقتل بالبطىء حلمى البسيط
مين بيتهم البرىء .. فاكرو عبيط"

بجد حلوة قوووووووي :)

عارفة سواد العسل...
اهو ده اللي حالك ليه وصل..!!

غير معرف يقول...

انا مش عارفة اقول ايه بجد

ربنا يحميكي يارب

2ragooZ يقول...

فعلا ما كانش بيمثل
:)

إبتسام مختار يقول...

Timo..
حلوة بوجودك
نورت :)

سهــر
ربنا يخليكى ليا :)
..

2ragooz
تسعدنى زياراتك المتقطعه :)
كان عندى استفسار بس ..
ليه مش بتثبت تواجدك بالفعل فى مدونتك ؟

omar يقول...

gamila gadan rbna y7fazak ya rab astmry mfish menk kteer

رشاقة قلم يقول...

رااااائعة..

أعجبتني.. مخمخت عليها

إبتسام مختار يقول...

عُمــر
فى أحسن منى كتير
نورتنى :)

إبتسام مختار يقول...

رشاقة قلم
سعيده بوجودك فى البوست ده بجد
بس محتاجتيش ترجمة ولا حاجه؟ :)
فهمتى العاميه المصرية فعلاً؟ :)