الاثنين، 4 يونيو، 2012

بين التقوُّس لأعلى أو لأسفل


غباء من الآخرين
مين قال إن الـdefault avatar تعني شخص جديد؟ طب لمَّا الأشخاص القدامى يحطوها، مين قال إنها لا تعني شيء؟ مين قال إن اللي ساكت neutral، مُجوف من جوّا؟ مين قال إن اللي قال عندُه حق في اللي قاله؟

أهو انتَّ
إبريل، مايو، يونيه.. موسم الامتحانات.. ليه بتحلوِّي يا دُنيا.. في الوقت ده بالذات؟

غباء منك أنت
عادةً، اللحظة اللي بتحس فيها إنك هتقول حاجة حلوة أوي وسط الكلام، فـ تبدأ ترتب الكلام في مكان جديد من الأول، هي اللحظة اللي بتقضي فيها على الحاجة الحلوة أوي، وبتنسى كل الكلام.

بين البينين
ولأنه ليست ثمة أسباب قوية تقنعك بشكل نهائي بالحزن، وليست لديك دواعٍ منطقية تدفعك إلى السعادة، تبقى هكذا متأرجحًا بين الاثنين. تحيا بمزاجٍ على شعرة؛ مع أول شخص يضحك ستضحك ملء شدقيك، ربما حتى البكاء. ومع أول نصف فرصة مناسبة للبكاء ستنفجر بكل ما كان وما لم يكُن.

مريَم
مش لازم تحس صوتها حلو، المهم تحس..(!)

أن تفقد عقلك
عن الهلاك.. فقدان الذاكرة: إنك تعمل وتقول حاجات متفتكرهاش والناس تفتكرها. إنك (تفكر) في عمل شيء ما كتير لدرجة إنك (تفتكر) إنك عملته بالفعل. إنك تركز زيادة في تحضير كلام لحد ما تحس إنك قُلته كتير قبل كده. إنك تدوَّر على حاجة أخدتها من حد وضيعتها وآخر ما تزهق تسأله بلا أمل إن كنت رجعتها له، فـ يقولك: آه، رجعتها.
 
 في بلاد الأي حاجة..
نهارنا حاجة.. وليلنا حاجة!

عودة
شعور رائع إنك ترجع بعد فترة بُعد طويلة، لعادة قديمة. ويكون أحسن لو تتأمل كون الرجوع جميل، عشان كان في قبلُه بُعد. اللي بيجي هنا كتير ممكن ياخد باله من المقصود.

 على فكرة..
لو مش عايز تتكلم، مش هتتكلم.. مهما عملت.

...
:(:

2 تعليقات:

عالمى ازرق يقول...

بين البينين
ولأنه ليست ثمة أسباب قوية تقنعك بشكل نهائي بالحزن، وليست لديك دواعٍ منطقية تدفعك إلى السعادة، تبقى هكذا متأرجحًا بين الاثنين. تحيا بمزاجٍ على شعرة؛ مع أول شخص يضحك ستضحك ملء شدقيك، ربما حتى البكاء. ومع أول نصف فرصة مناسبة للبكاء ستنفجر بكل ما كان وما لم يكُن.

حساكى فيها اوى

غير معرف يقول...

إبريل ، مايو، يونيه ، يوليه :)) اغسطس :)) . . . . يا مسهل .
وهيـا مين مريم بقا ؟؟؟
أسلوبك فـ الكتابه ده والمدونـه بحالها
حاسستنى بإحساسى اللى حاسيته لما كنت بفتح المدونه وانا قاعده تحت الشباك .. هناك .. فـ الإمارات ، أيام الثانوى والـ صحبه والـ الدراسه الحلوه والـ أنا .
فاطمـه .