الثلاثاء، 31 يوليو، 2012

منسي وحُر


سجّل
أنا مبسوط
:)

--
درويش بتصرُّف

الخميس، 26 يوليو، 2012

ياللي بتسأل عن الحياة


لمة الناس اللي بتحبهم.. الهزار اللي في وقته.. الضحك حتى التعب.. الصُدَف الحلوة.. الأحلام اللي بتنوّر حاجة في دماغك.. رسايل ربنا اللي مفيش شك إنها مبعوتة من عنده.. الناس اللي بتكتبلك قلب وهي تعنيه.. حضن ماما.. الناس اللي بيعرفوا يكونوا ماما.. الناس اللي بيحسسوك وانت بتتعامل معاهم إنك بابا.. المزيكا اللي بتخليك تطير.. لحظات استمتاعك بالرغي حتى لو محدش بيسمعك.. الحد اللي بيسمعك.. الحد اللي بيحب يبسطك.. الناس اللي بتحب تبسطهم وتتبسط عشانهم.. الكلمة الحلوة.. اللي بيبتسموا للغرباء في الشارع.. والغرباء اللي بيردوا الابتسامة بمثلها.. المفاجآت.. الفوانيس.. البلالين.. الابتهالات اللي بتدفي.. الأغاني اللي بتجيب طراوة.. الناس اللي مصدقين إن عندنا ثورة.. الناس اللي مصدقين "الثورة".. الناس الطيبيين.. الصبح بدري.. مواصلات الصبح بدري.. اللي مبيحبوش السياسة.. اللي عارفين الهدف الحقيقي من ورا "اختراع" السياسة.. الكُتب.. وسط البلد.. الصوفية.. الآيات اللي حافظها بتجويد عبد الباسط، والسورة اللي حفظتها من كتر ما شفت والدك بيصلي بيها.. المَشاهِد اللي حاسس إنها اتكتبت عنك.. الناس اللي بتاخد الكلام من على لسانك، والابتسامة اللي مبتشرحهاش لما الناس تاخد الكلام من على لسانك.. الصور الحلوة.. الخط الحلو، والخط اللي ميتقريش.. الرسم.. الحاجة المعمولة بإيدك.. الرقص بكل طاقتك، والجري لآخر نَفَس عشان تفرّغ طاقتك.. الناس اللي بتتابعهم وتطمن عليهم من بعيد، والناس اللي بيحبوك من بعيد، ونفس الناس لمّا يصارحوك فجأة إنهم بيحبوك.. الحب، والرضا، واليقين، وراحة البال.. التفاصيل، والناس اللي بتركز في التفاصيل، وإن التفاصيل لا تفنى ويُمكن استحداثها من العدَم، وإن اللستة تطوْل ولكل واحد لستته..

عندما تنظر للدنيا عن بُعد، لن تجدها جميلة باسمة الثغر، بالعكس، غالبًا ستجد أنها قبيحة وذات وجهٍ مُرعب. لكنك عندما تقترب، تخلق التفاصيل، وترى منها ما لم يقرر غيرك أن يراه، ستجد أن الكمال ليس مهمًا. والسعادة الأبدية المستمرة -التي لا تتحقق أبدًا- ليست بتلك الأهمية هي الأخرى. المهم هو أن نستمتع بالأشياء البسيطة، التفاصيل الصغيرة التي في أيدينا. المهم ألا نؤجل الأشياء المُبهجة التي يمكننا القيام بها، لمجرد أننا ندرك أن بهجتها لن تدوم.

ربما يكمُن السر في أن الحياة أشبه بفيلمٍ سينيمائي عادي، في مجمله ليس رائعًا، وربما ينقُصه الكثير من مقومات الفيلم المُلهِم، لكن العبرة بالحالة.. العبرة بالتفاصيل.

-- 
الصورة من فيلم "بصرة"، حيث يمكن تطبيق ما سبق.

الخميس، 5 يوليو، 2012

باي باي


على ورق البونبون.. اتبْعني

يُعاد 
ووجدتني أتكلم أكثر من السابق
لكني، غالبًا، لا أقول شيئًا..
.
لَنَفَذ
ووجدتني أصمت أكثر من السابق (المؤقت)
لا لشيء غالبًا..
أصلًا.. لا شيء

علي بن أبي طالب:
"لولا أن الكلام يُعاد لنفذ".

بونبون
إدمان.. للذوبان.. الكثيــر..
للنعناع.. للتكسير(!)
للألوان، وصوت التقشير..

من غير mention
أحب الكلام الحلو عنهم.. في غيابهم
 أحب الرسايل تتبعت من غير ما توصل
أحب الرسايل لمّا توصل صُدف
أحب الرسايل الحلوة
أحب الرسايل

سارة سويدان
بتفصلني!
وبحبها..

وانت ازيَّك؟
الحقيقة إن المبسوطين مش بيقولوا إنهم "كويسين"..
بيكون عندهم كلمات تانية كتير تعبر بشكل أحسن عن حالتهم 

كويس؟
إذا لم تكن سعيدًا/ حزينًا/ راضيًا
اقتل نفسك من فضلك

أجازه..
ساعات من كتر الفضا بتتشغل
من كتر الاختيارات مبتختارش
من بين كل الأشياء لا يبقى سوى اللا شيء
ساعات الفراغ بيعمل زحمة

فقرات
أخشى أن تكون عودة للإغراق في الصمت والإبهام

وداعًا
رحيل مؤقت،
عن عاهات مُستديمة

يالهوي احنا كبرنا أوي!